«Ислам және дәстүр құндылығы» жылы аясында Маңғыстау облыстық орталық «Бекет ата» мешітінде Мәуліт айы қарсаңында «МUFTIYAT» баспасынан жарық көрген «Пайғамбарымызды танисыз ба?» кітабы жамағатқа таныстырылды.

Бесін намазына жиналған жамағатқа облыс бас имамы Пайғамбарымыздың (оған Алланың салауаты мен сәлемі болсын) мүбарак өміріндегі маңызды оқиғаларға шағын шолу жасалған кітапты жамағатқа таныстырып,жамағатқа тегін таратылды.

Кітапта Пайғамбар мен әулие, Құран даналықтары, мұғжиза мен керемет, Мекке мен нұрлы Мадина қалаларының қасиеттері, салауат пен мәуліт сияқты өзекті тақырыптар түйіні кеңінен тарқатылған. Сондай-ақ әлемдік және қазақ ойшылдары мен ғұламаларының Пайғамбарымыздың (оған Алланың салауаты мен сәлемі болсын) тұлғасы жайлы толғаулары жазылды. Аталмыш еңбекте әз Пайғамбарымыз (оған Алланың салауаты мен сәлемі болсын)  жайлы көпшілікті толғандырған 260-қа жуық сұраққа жауап берілген.

Сонымен қатар, облыс бас имамы алдағы уақытта  «Пайғамбарымызды танисыз ба?» кітабынан жамағат арасында сұрақ-жауап сайысы өткізілетіндігін айтып өтті.