Жаңаөзен қалалық орталық «Әбіш қожа» мешітінің бас имамы Жұмырбаев Жұмабай «Оразмағанбет ахун Тұрмағанбетұлы» мешітінің жамағатымен жүздесіп «Отбасындағы адалдық пен жауапкершілік» және «Дін мен дәстүр – егіз ұғым» тақырыптарында тағылымды уағыз-насихат айтты.

Ұлттық нақышта безендірілген киіз үйде, ақ дастарқан басында өткен рухани басқосуда бас имам асыл дініміз Ислам мен қазақтың сан ғасырлық салт-дәстүрінің өзара сабақтастығына ерекше тоқталды. Ол халқымыздың әдет-ғұрпы мен ырым-тыйымдарының бастауында шариғат қағидалары жатқанын атап өтіп, ұлттық құндылықтарды дәріптеу – имандылықтың айнасы екенін жеткізді.
Кездесу барысында отбасы институтының беріктігі, ерлі-зайыптылардың бір-біріне деген адалдығы мен ортақ жауапкершілігі кеңінен сөз болды.
Шара соңында ел амандығы мен жұрт тыныштығы, әрбір шаңырақтың береке-бірлігі үшін дұға жасалды.