Маңғыстау облысының бас имамы Әнуар Ізімбайұлының бастамасымен «Насихат керуені» Жаңаөзен қаласында жамағатпен жүздесіп, жұма уағыздарын жүргізді.

Облыстың бас имамы Әнуар Ізімбайұлы Жаңаөзен қалалық орталық «Әбіш Қожа» мешітінде «Суицид – ауыр күнә» тақырыбында жұма уағызын айтты. Уағыз барысында адам өмірінің қасиеттілігі, қиындыққа сабырмен қарау, үмітсіздікке бой алдырмау және ислам дінінде жанға қастандық жасаудың ауыр күнә екені кеңінен түсіндірілді. Сондай-ақ, жамағатқа Алланың рақымынан үміт үзбеу, кез келген сынақтың артында жеңілдік бар екені насихатталды.

Сонымен қатар, «Насихат керуені» құрамындағы дін қызметкерлері Жаңаөзен қаласына қарасты мешіттерде жұма уағыздарын жүргізді:

• Ақтау қалалық «Ержан хазірет» мешітінің  имамы Ахлиддин Мирсаидұлы – Теңге ауылдық «Қосай ата» мешітінде;
• Ақтау қалалық «Шопан ата» мешітінің наиб имамы Айдос Жамбылұлы – «Оразмағанбет ахун» мешітінде;
• РАНТ мүшесі,«Ар-Рахман» мешітінің бас имамы Юнус Қадырқұлұлы – «Мұханмедин Шихыұлы» мешітінде;
• Басқұдық ауылдық «Төлей ишан» мешітінің бас имамы Наурызбай Құралбайұлы – Теңге ауылдық «Сәби Атабайұлы» мешітінде жұма уағыздарын жүргізді.

«Насихат керуенінің» басты мақсаты – жамағаттың діни сауатын арттыру, имандылық пен отбасы құндылықтарын дәріптеу, қоғамда ізгілік пен бірлікті нығайту болып табылады.