Аса қамқор, ерекше Мейірімді Алланың атымен бастаймын!

Құрметті Маңғыстаулықтар!

Қазақстан мұсылмандары діни басқармасының Маңғыстау облысы бойынша өкілдігінің, жергілікті дін қызметкерлерінің және өзімнің атымнан сіздерді Амал мерекесі – Көрісу күнімен, еңсесі биік елдіктің, іргесі сөгілмес бірліктің, ырыс пен ынтымақ мейрамымен құттықтаймын.

Бүгінгі Мемлекет басшысы Қасым-Жомарт Тоқаевтың қазақ халқының қыстан аман шығып, бір-бірінің хәл-жағдайын сұрайтын ерекше дәстүрі Көрісу немесе Амал күнімен құттықтауы,ағайынның қыстан аман шығып,ел амандығының айғағы деп білеміз.

Міне биыл ұлық ай Рамазан айында,қасиетті жұма күнімен тұспа-тұс келіп отырған Амал мерекесінің халқымыз үшін орны бөлек. Өткен жылдан жаңа жылға есен-сау жеткендігіне шүкір етіп, қытымыр қыстың кері шегініп, жер аяғы кеңіп, жер-дүниенің гүлденіп, ел бұл күні қол алыса жамырай көрісіп, құшақ айқастыра жадырай қауышады.
Тегінде, Амал – елдік, халықтық мейрам. Себебі бұл күні бірлік күшейеді, береке молаяды.
Ата тарихты ұрпаққа жеткізу жолын оны ел үшін де, елге келер қонақ үшін де айшықтап көрсетер үлгінің бірегейі – өлкеміздің ерекше мерекесі осы Амал.

Ел ырысы мен татулығына айналып, құт дарыған Амал мейрамы– көктем мен жаңаруды айшықтайтын мерейі тасыған ұлы мереке. Ол – өткенді саралап, болашағымызды болжайтын ерекше кезең.

Ақ ниетпен өткенге салауат айтып, ақ тілекпен жаңа Амалды қарсы алайық! Отанымызға – береке, халқымызға – игілік, мемлекетімізге – молшылық, ал әр шаңыраққа бақыт пен шаттық тілеймін.
Амалдан амалға аман есен жете берейік!

       Құрметпен ,Маңғыстау облысының бас имамы Әнуар Ізімбайұлы