Мұсылман қауымы үшін қасиетті Рамазан айының орны ерекше. Бұл – адамдардың жүрегіне иман нұрын сеуіп, рухани тұрғыдан жаңаруға мүмкіндік беретін берекелі кезең. Рамазан – сабыр мен шүкіршілікті, мейірім мен қайырымдылықты насихаттайтын ай. Сондықтан бұл ай мұсылман баласының өмірінде айрықша мәнге ие.

Алла Тағала қасиетті Құран Кәрімде:
«Ей, иман келтіргендер! Сендерге бұрынғыларға парыз етілгендей, ораза парыз етілді. Әрине, тақуалыққа жетулерің үшін»
(Бақара сүресі, 183-аят) – деп баяндайды.

Бұл аятта оразаның негізгі мақсаты – адамды тақуалыққа тәрбиелеу екені айтылған. Яғни ораза тек ішіп-жеуден тыйылу ғана емес, ол адамның жүрегін тазартуға, мінезін түзетуге, рухани кемелденуіне жол ашатын құлшылық.

Ислам дінінде Рамазан айының маңызы зор. Өйткені дәл осы айда адамзатқа тура жол көрсететін қасиетті Құран Кәрім түсірілген. Сондықтан мұсылмандар бұл уақытта Құран оқуға, дұға жасап, құлшылықтарын арттыруға ерекше көңіл бөледі.

Пайғамбарымыз Мұхаммед (оған Алланың салауаты мен сәлемі болсын) хадисінде:
«Кімде-кім Рамазан айында иман келтіріп, сауабынан үміт етіп ораза ұстаса, оның бұрынғы күнәлары кешіріледі»
(Бұхари, Мүслім) – деп сүйіншілеген.

Бұл хадис Рамазан айының мұсылман үшін үлкен мүмкіндік екенін көрсетеді. Әрбір адам осы айда жасаған құлшылықтары арқылы Алланың кешіріміне және разылығына жетуге ұмтылады.

Рамазан айы келгенде қоғамда мейірім мен жанашырлық ерекше сезіледі. Мұсылмандар бір-біріне қолдау көрсетіп, мұқтаж жандарға көмек беруге асығады. Ислам дінінде қайырымдылық жасау, садақа беру – үлкен сауапты амалдардың бірі.

Алла Тағала Құран Кәрімде:
«Жақсылық жасағандар – жақсылық табады»
(Рахман сүресі, 60-аят) – деп баяндайды.

Сондықтан Рамазан айында қайырымдылық шаралары кеңінен ұйымдастырылып, әлеуметтік жағдайы төмен отбасыларға көмек көрсету игі дәстүрге айналған.

Жаңаөзен қалалық мешітінде де қасиетті Рамазан айының құрметіне түрлі рухани және қайырымдылық шаралары ұйымдастырылып келеді. Мешіт ұжымы жамағатпен бірлесе отырып, қала тұрғындарына Рамазан айының мән-маңызын түсіндіру мақсатында уағыз-насихат жұмыстарын жүргізуде.

Мешітте ауызашар дастархандары ұйымдастырылып, жамағаттың бір-бірімен бауырластығын нығайтуға көңіл бөлінуде. Ауызашар – мұсылмандарды жақындастыратын, татулық пен бірлікті арттыратын игі дәстүрлердің бірі.

Пайғамбарымыз (оған Алланың салауаты мен сәлемі болсын):
«Кімде-кім ораза ұстаған адамға ауыз аштырса, оған да сондай сауап жазылады»
(Тирмизи) – деп айтқан.

Бұл хадис ауызашар ұйымдастырудың қаншалықты сауапты іс екенін көрсетеді.

Қасиетті айда қайырымдылық шаралары да ерекше мәнге ие. Жаңаөзен қалалық мешіті жамағатпен бірлесе отырып әлеуметтік жағдайы төмен отбасыларға көмек көрсетіп, мұқтаж жандарға қолдау білдіріп келеді. Мұндай игі істер қоғамдағы бауырмалдық пен жанашырлықтың артуына себеп болады.

Рамазан айының тағы бір ерекшелігі – адамдардың бір-біріне деген кешірімділігі арта түседі. Көпшілік бұл уақытта ренжіскен адамдарымен татуласып, қарым-қатынастарын түзетуге тырысады. Себебі Ислам діні адамдарды татулыққа және бірлікке шақырады.

Қазақ халқы да ежелден рухани құндылықтарға ерекше мән берген. Ұлы ойшыл Абай Құнанбайұлы:
«Адамзаттың бәрін сүй, бауырым деп» – деп, адам баласын бір-біріне мейірімді болуға шақырған.

Бұл сөздер ислам дінінің негізгі қағидаларымен үндесіп жатыр. Өйткені дініміз адамдарды бір-біріне қамқор болуға, татулық пен сыйластықта өмір сүруге үндейді.

Жастар тәрбиесінде де Рамазан айының маңызы ерекше. Жастар мешітке келіп, дініміздің негіздерімен танысып, рухани тәрбие алады. Үлкендердің өнегесін көріп, қайырымдылық шараларына қатысу арқылы олар адамгершілік құндылықтарды бойына сіңіреді.

Жалпы, Рамазан айы – адамды сабыр мен шүкіршілікке, қайырымдылық пен мейірімділікке тәрбиелейтін ай. Бұл айда жасалған әрбір жақсылық қоғамдағы бірлік пен татулықты нығайтады.

Алла Тағала барша мұсылман қауымының ұстаған оразаларын, жасаған құлшылықтарын қабыл етсін. Қасиетті ай әр шаңыраққа береке, тыныштық пен молшылық әкелсін. Елімізде татулық пен бірлік нығайып, халқымыз амандық пен игілікке жете берсін.

Жаңаөзен қалалық «Шаңырақ»мешітінің наиб имамы

   Наукебаев Ғабит Жаңабергенұлы